عاشرتك نجم

عاشرتك نجم من جان عمرك ليل
أذوب واشتعل حته ابقى أضويلك
ومن طلعت شمس خط رجعه ماخليت
ماجازيتني لمن خلص ليلك
بانيلك جنت خضره عشك بالروح
... ... ومرقد للمحبه بروحي بانيلك
ردت منك أمراد وخذت مني أمراد
وعلك بجفوفي شايلهن زناجيلك
وانذزلك جنت وافتر واحني الباب
هسه اتهدمت ياباب احنيلك
أمانه اسرار عمري وبيها ماأوصيك
يم شباج ذنبك صاحن دخيلك
وبكيفك بعد صون الامانه أتخون
مااكدر بعد اغفر وعديلك
مابيك وبينك حيرتني وياك
مره ابجي على طبعك مره أغنيلك
بدلالك جن طفل بالجرح مال اكبار
أشد الجرح بيد وبيد الوليلك
لاتنصف عدل لاترضه بالمقسوم
تأخذ حصتك ومن حصتي اوديلك
انته الوزعت والفرح سهمك صار
من سهم الحزن شتريد اخليلك
حبتها وياك شعره وعاقل ومجنون
كلساعه وتجرها وانه ارخيلك
شلي بهلتعب والعمر وشله كاس
من كاس العمر جم دوم ابديلك
راح اصبر بدونك وارهم بلياك
واذبح رمش عيني الجان يبجيلك
واتحمل عذابك والبعد والشوك
وماحط صورتك كدامي وأشكيلك
مااكلك نسيتك بس جرح بالروح
يكسر واهسي ومايقبل امشيلك
عيني الشالتك كلتلها اشيلج راح
كالت شيلني وماقبلت تشيلك
وجرحي الفاك صدره ومايريد أخياط
واكف جنه واحد جاي يدعيلك
بس مجبور ادفنك ياعشك ياشوك
واقره الفاتحه وبالوحشه اصليلك
بعيوني الحزن يقرونه اليواسون
والفوك الحزن لوتدري شاحجيلك
شمات الاجو واسوني ثالث يوم
حيل وياك كالو مدري شد حيلك
وكالو مو حلو الثوب الطويل أعليك
واليكصر بعد لتضن يكفيلك